Invistigason

Prujetu Konstelason di Mimória: Un studu multidiresional di mimória y migrason pós-kolonial ta splora kes konpleksu interseson entri mimória, migrason y pós-kolonialismu na Portugal di gósi. Disintegrason di inpérius kolonial eurupeu disinkadea muvimentus na grandi skala di gentis – tantu di antigus populason kolonizador komu di kolonizadu – na direson di Europa. Na kontestu purtuges, migrason rikonfigura di forma sinifikativu tisidu sosial e kultural di país, y e labanta kistons urgenti sobri mimória kuletivu, pertensa y identidadi na piriudu pós-kolonial. ​​​

​

​Finansiadu pa Fundação para a Ciência e Tecnologia, Konstelason e un Prujetu di invistigason sediadu na Centro de Estudos Comparatistas (CEComp) di Faculdade de Letras da Universidade de Lisboa (FLUL), ku kulaburason di Instituto de Ciências Sociais da Universidade de Lisboa (ICS-UL). 

​

Situadu na kunfluénsia entri antropolugia, susiolugia y stória, es Prujetu ta invistiga paisaji di mimória pós-kolonial moldadu pa migrason di antigus kolónias purtuges na Áfrika pa Europa. E ta foka sobritudu na transformason sosial y pulítiku disinkadiadu pa fin di dumíniu kolonial purtuges, ku spisial infoki na disenvolvimentu di zonas abitasional ki foi kriadu pa da risposta a fluksu migratóriu risultanti.    

​

Zona di invistigason: Vale da Amoreira 

​

Trabadju di kanpu sta sentradu na Vale da Amoreira, un bairu suburbanu di margen sul di Ária Metropolitanu di Lisboa. Skudjidu pabia di ses karateristikas isesional, es zona e, desdi 1975, lar di diversus subgrupu di populason pós-kolonial, inkluindu antigus kolonu (retornadus) y imigrantis di antigus kolónia purtuges. Es bairu e markadu pa un grandi rikesa y diversidadi kultural, y e ta oferesi un terenu fértil pa studa modi ki diferentis grupus pós-kolonial ta vivi, lenbra y rimagina ses stórias kumun y kontestadu. 

​

​Foku y obijetivus di invistigason 

CONSTELLATIONS ta isamina stórias, mimórias, identidadis y trajetórias interligadu di kes grupu, omesmu tenpu ki e ta analiza modi ki es ta relasiona ku kunpanheru y modi ki es ta forma redis transnasional na kontestu sosiokultural spisifíku. Na se serni, es Prujetu ta invistiga kes “konstelason di mimória” kriadu pa migrason voluntáriu y forsadu na riskaldu di inpério. 

Ku bazi na konseitu di mimória multidiresional di Michael Rothberg, CONSTELLATIONS ta splora modi ki novus konfigurason di mimória ta surji di inkontrus dizigual entri grupus pós-kolonial. En ves di trata-s komu kumunidadis siparadu o opostu, es Prujetu ta infatiza ses intralasamentu, kes spasus ki es ten en kumun y spriénsias sobrepostu – enbora diferenti – di kolonialismu, migrason y pós-kolonialidadi.

​

Un nobu abordaji di mimória pós-kolonial

​

Prujetu ta propoi un abordaji sistémiku, inpirikamenti fundamentadu y multifasetadu pa studu di mimória y di migrason pós-kolonial. Sentradu na dimensons sima klasi sosial, géneru, rasa, etnia y kultura, e ta disafia narativas duminantis ki ten tendénsia pa omojeniza diferensas kultural y rasial. CONSTELLATIONS ta kontribui pa un konprenson más matizadu di modi ki mimória pós-kolonial ta disinrola na Europa di gósi y modi ki dizigualdadi di klasi ta kruza ku legadu kolonial na formason di mimória y di identidadi.  

​

Metodolugia

​​

Prujetu ta usa un metodolugia interdisiplinar y multimodal, kunbinandu: 

• Intrivista aprufundadu ku gentis di Vale da Amoreira; 

• Studu itnográfiku di anbientis di mimória y vida kotidianu;

• Itnografia dijital di plataformas di redis sosial; 

• Análizi sosiokultural di narativas di mimória pós-kolonial y dibatis públiku.   

​

Trabadjandu na stretu kulaborason ku kes kumunidadi ki e ta studa, CONSTELLATIONS kre pruduzi kunhisimentu ki ta ser omesmu tenpu akademikamenti rigurozu y sosialmenti inpenhadu. 

Menbru di Ikipa